me innleier straks sommarsesongen!

For ein Colchesterfantast fins det neppe eit vakrare syn..! Vogna vår trilla ut på sin andre luftetur i dag, etter eit vinterhalvår under tak, og er snart klar for å vise seg fram. Sundag er du meir enn velkomen til å innom for å helse på!

snart klare for eit nytt Øyfjell Grand Prix!

Sundag 1. juni er Colchester'n på plass att. Sannsynlegvis plassert lett tilgjengeleg - midt i olabilgryta (les; Solvang). Me gledar oss til ein heidundrande dag med fart og moro, der me kan heie små og store olabilentusiastar over mållina! Like mykje ser me fram til dokkevogn- og trøbilparaden opp det som må kunne reknast som ei av hovudgatene i Øyfjell. Detta blir så stas!

skrapemani og pussestøv

Tøydokka klappar seg sjølv på skuldera for fyrste dugnadsinnsats i Straumebui (og sender samtidig eit klapp til Sydama, som svettar over sine eksamensførebuingar). Så prøvar ho iherdig - og sannsynlegvis fånyttes - å kvitte seg med pussestøv i håret, gnir skrapemusklar og smiler stort over utsikter til nokså snart å kunne flytte inn i eit spell nytt og likevel eldgamalt butikklokale.

Nikkar til dagens yngste dugnadsarbeidar sine kloke ord; "Det er jammen bra dette huset ble laga av tre, for da varer det i ti tusen år, minst".

knallhard marknadsføring på trappene

Ja, ja - knallhard og knallhard. Nokre kjappe tastetrykk som klistra eit meir eller mindre velvald slagord over magebeltet på Colchester'n er det me har prestert så langt. Likevel - intet mindre enn tusen eksemplar av dette utsøkte flygebladet skal nokså snart innta Vest-Telemark (me nyttar høvet til å takke høgare makter for at det fins nokon som let to kremmarar koma på marknadsføringsbanen trass rimeleg slunkne lommebøkar). Før du veit ordet av det har det hamna i postkassa di - du er med dette førebudd.