så fint at det gjer vondt!

Det einaste, vesle skåret i gleda er at kleda du her ser bilete av høyrer til tidlegare kolleksjonar... Med andre ord får me nøye oss med å kvile augo på akkurat desse plagga - og heller glede oss vilt og uhemma til kva me snart har i vente!

siste krampetrekning før joleferie

 

Ja, Tøydokka tar det med ro.

Dette her er litt slik Flåklypaaktig, tenkjer ho der ho tassar rundt og pakkar ut att bui etter marknadshelg, med god hjelp av sine eigne variantar av Solan og Ludvig. Dei går no her alle tre - to små og ei litt større - og tumlar med sitt i påvente av at det kjem gjester og kakkar på døra. Snart er det ikkje lenge før Sydama får joleferie (Sydama - må bli Ben Reddik Fy Fasan, det då?!). Då blir dei fire til å stuke og stelle - og me kan difor delvis garantere at ting er på stell til siste innspurt før jolefreden senkar seg over alle og ein kvar! Stikk gjerne innom oss før den tid!

gryande jolestemning

Sydama og Tøydokka trippar av forventing om dagen (for Sydama sin del skuldast det beklagelegvis delvis av eksamensnerver). Det nærmar seg jol, må vite - og enn så lenge ligg snoen tykk og kvit. Hadde ikkje Tøydokka jolefryden på plass før, så fekk ho han iallefall på plass i går, då ho var med på jolemarknad i Høydalsmo. Ormbrekk gard i den blåaste blåtimen er eit syn du burde få med deg - så var du der ikkje i år bør du sikre deg synet til neste år!

Spennande nytt frå Lucie Kaas er rett rundt hjørnet. Me gledar oss stort, og håpar me ser deg i dei dagane det er att før me tar ein liten joleferie!

oi,oi,oi...

... gått ei tid sidan det vart skribla her sist, gitt... Skal ikkje love at det blir andre bollar framover, men har eit lite håp om at det er nett det det skal bli! Om det er stille akkurat her, kan me love at det ikkje er like stille rundt Sydama og Tøydokka slik i det verkelege liv! Dei har det travelt med å legge både vidløftige og meir jordnære framtidsplanar for deira felles geskjedt, samtidig som dei gledar seg stort til å dukke opp på eit par jolemarknadar som er rett rundt hjørnet! Me blir å finne på Galleri Straume torsdag 5. desember, kl. 17-20.00, og i Byrte den 8. desember. Kan hende møter me deg der? Det trur me nok me ville ha lika!

kremmarbod og klappstolar

Me overraska denne laurdagen oss sjølve med å hugse på å putte to stk. klappstolar i bagasjerommet (eller bagasjeromma - me køyrde faktisk i karavanestil over rettlina, av praktiske, langt frå sosiale årsakar). Gav så absolutt meirsmak, og blir mest sannsynleg fast inventar på kremmarturane framover.

Når det er sagt, er det på sin plass å informere om at Tøydokka sitt gjesterom klargjer seg for nok ein sesong som butikklokale (styreleiaren gler seg over at det endeleg, som fylgje av nett dette faktum, er toleg ryddig der inne att). Med andre ord vil kremmarane fortsatt vere tidvis på hjul, men har vore omsutfulle (er det eit ord?) nok til å planlegge vinterlagring for si kjære campingvogn i næraste framtid.

forblåst torgdag

Torgdag på Øyfjell bygdemuseum har blitt nærmast ein hausttradisjon for dei to kremmarane å rekne - i år intet unntak. Tøydokka troppa opp - utan campingvogn, men med noko av innmaten, i tillegg til to miniatyrkremmarar (som rett nok fann det langt meir interessant å leike i sandkassa og eta sveler enn å drive forretning). Eit par stativvelt, men elles gjekk dagen knirkefritt. Tusen takk til alle som slentra innom oss!

smekker over fjellet

Tenke seg til - no skal me snart levere smekker til Bergen! Bergit Brattekås - vår nyutnevnte marknadsføringsansvarlege - har vore snartenkt nok til å drive ei form for lobbyverksemd i barnehagen til hennar to unge, lovende. Med smekkene vel over fjellet, føyer denne betillinga seg elegant inn i det som nærmast kan sjå ut til å bli vår vesle nisje. Dalen barnehage var nemleg fyrst ute med å sikre seg Småfolksmekker til dei minste matglade. Me let jubelen stå i campingtaket!

30% på heile bui!

kremmarane førebur langtur

Heilt til Rjukan, skal me! Vel og merkje utan Colchester'n, som har trilla nok i sommar. Kunne rett nok vore spennande for han å få oppleve fartsrekord over rettlina, men det får bli ei anna gong. 7. september står me på Kjeringtorget og førebur oss på invasjon frå 1600 turglade - me gledar oss!

Stikk innom Kjerringsveiven si facebookside HER!

ei ørlita presisering

Tøydokka kom i skade for å uttale seg om at vårt einaste alibi for eigenproduserte varer hadde foretatt eit eigarskifte sist laurdag, utan å presisere at dette gjeld saum.

Sydama har sjølvsagt lura inn ei hekleøkt eller to mellom matematiske utrekningar og svette eksamenar i Grimstad, og klaska eit knippe herlege gryteunderlag i disken for ei tid tilbake. Du kan sjå dei der dei ligg og blømer, omtrent midt i biletet. I påvente av at me får i gang symaksinene att føreslår me at du kokar deg opp noko varmt og nyt det, medan kjelen kviler på eit av desse!

mellom lappar og løppur

Aldri har me vore ute i så god tid! Var på plass, ferdigrygga, utpakka og klare til dyst før klokka slo elleve og bygdedagen i Åmotsdal 2013 offisielt var i gang - tenk det! Med sola toleg jamnt steikande vart det ein fin-fin sommardag. Me pendla mellom solvegg, campingvogn, loppemarknad og mattelt - der me var så heldige å få forsyne oss fritt. Kan to kremmarar på hjul ha det betre?? Neppe.

Då me trilla oss ut frå parkeringsplassen tidleg kveld (med tre velfungerande sommardekk og eit stk knatrande piggdekk grunna ei uventa punktering (når er punkteringar venta?)), kunne me oppsummere ein langt over middels triveleg og innbringande dag. Tusen takk for at me fekk koma til Åmotsdal, og til alle som var innom oss der!

(Det einaste alibilet vårt med tanke på eigenprodusere kreasjonar, forlet vogna denne dagen, og kremmarane innser no at det er på høg tid å få fart på symaskinene. På veldig høg tid).

rapport frå tidenes kremmarhelg!

Det var to lukkelege kremmarar som, meir eller mindre knirkefritt, kunne hekte Colchester'n bak fullstappa bil og ruse ned Eidsborgberget sist laurdag. Oldemors gatefrukost på Dalen baud på sommarvarme, herleg mat og drikke frå Tone på Spitet, jamnt tilsig av kundar - og eit forfriskande regnskyl då me var klare til å vende nasa heimover att.

Dagen derpå venta ei noko kaldare oppleving på Bygdemarknaden på Rauland, der ullgenser og eit ynskje om sydvest galant erstatta gårsdagens stuttbukser og solbriller. Bitande kaldt, men dog - det var to jublande glade kremmarar som køyrde heim att etter å ha sett ny, heidundrande salsrekord! (rett nok etter ein times leiting etter bilnyklar før heimreise...).

Tusen takk til samtlege kundar - og for ikkje å gløyme Mr. G, som var storsinna nok til å låne oss sin elskede Caddy til Dalen!

Øyfjell Grand Prix vel overstått!

Ein makalaus dag går mot slutten. Øyfjell Grand Pix er over for denne gong, men me lever lett på gode minner fram til neste løp går av stabelen! All ære til kreative, nevenyttige og uredde olabilsjåførar, dyktige dugnadsarbeidarar og eit imponerande stort publikum for eit herleg arrangement!

 

Det kribla nok litt i Colchester'n etter å seta utfor i lag med eit fantastisk koppel olabilar, men han måtte fint nøye seg med å stå og sjå på sirkuset. Temmeleg så stas var det nok likevel, for Sydama har sett ny standard for campingvogninventar dei siste dagane!

 

Til tysdag er det verd å nevne at de finn oss i meir sentrale strok av Øyfjell, nærare bestemt i tunet til Sydama sitt opphav - rett over vegen for barnehagen. Der sit me nok og knaskar graslauk, som hittil er det einaste Tøydokka kan ta med frå eigen kjøkenhage, eller eventuelt eit kjeks eller to. Du skal få smake du òg, om du vil!

Home, sweet home!

Då er vår høgt elska Colchester tilbake på plass, blank og fin (rett nok ikkje på grunn av hederleg innsats med såpesvamp og poleringsfille frå dei to kremmarane si side, snarare takka vore eit realt vårleg regnskyl!).

kremmarhelg!

Det er vår i lufta, kremmarane kan lukte det! Det luktar smeltesno, gjørme og jord - fine greier! Det kriblar lett i utolmodige kremmarkroppar - for tenk, snart er me på hjul att. Trass vårfornemmingane er det imidlertid piggar i dekka enno, for ein kan aldri vite her oppe i fjellbygdane... Og Colchester'n ligg fortsatt i vinterdvale, så heilt i rute er me ikkje før sommarsesongen. Likevel ladar me godt opp denne helga, då det ventar to heile dagar med handel og vandel.

Laurdag 27. april, mellom kl. 11.00 og 14.00, sparkar me igang Handelsmøte i Gamleveg att, før Vårmarknad i Lårdal, frå kl. 12.00-17.00 ventar på sundag. Me gledar oss!

morgodagens Røvarkaup

 

Ljoseblå body frå Småfolk, str. 92 og 98, kan bli din (dine, for den saks skuld!) for kr. 170,-

påskehøns 2013

Fjorårets påskehøns frå Om att var eit knippe fornemme fruer av finull, men sneisane har fått kvile i 2013... I staden vaks det fram nokre lutrygga fjærkre under symaskinfoten. Til venstre ser de Bettina, som med eit overutvikla hønemorsinstinkt byr alle og ein kvar på heimebaka brød (sjølv om dei ikkje har lyst på). Like ved vaglar Aurora - ei pensjonert karrierehøne, som sjølv påstår at ho hadde ein finger eller to med i klekkinga av idèen om Kinderegg i si tid.

Kommentar frå Tøydokka sin detaljfokuserte son; "Du mamma, du glømte augor!".

 

 

 

Om att on tour

Kremmarane kapra ei snofonn utanfor Galleri Straume, rigga seg til med klappstolar og sitjeunderlag, solbriller og sjokoladekake (all ære til Sydama for makalaus bakst!).
Lunsjen tok me innandørs - elles samla me fregner så godt det let seg gjera, og la ein heil drøs med planar for korleis me kan effektivisere nomadelivet vårt framover. Om det let seg gjera i praksis, gjenstår å sjå!

Tusen takk til damene på Galleriet for å gje oss tumleplass og selskap langfredag!

litt slik...

...er det her òg, gitt!

Til alle som lurar - kremmarane har ingen planar om å reise utanbygds i påska. Ein skitur kan dei finne på å ta seg, men då er me sannsynlegvis ikkje så frykteleg langt unna då heller!

Med andre ord gjeld desse opningstidene - er Tøydokka heime er bui open!

Langfredag står me, klare som påskeegg, i ei snofonn utanfor Galleri Straume. Med solbriller, Kvikk-lunsj og appelsiner (om det så striregner...) - og ein heil brøte butikkinventar! Kanskje har me nye varer frå Ugly i hus innan den tid - i så fall er det ingenting å lure på, langfredag møter me deg på Straume!

vervekampanje!

Det er med store, særs nøgde smil om munnen det registrerast stadig fleire tilhengjerar på facebooksida vår! På forrige krigsråd fann imidlertid kremmarane ut at dei kan tenkje seg å slenge ut ei ny vervekampanje, i håp om at det skal bli endå fleire! Tøydokka forstår seg sjølvsagt ikkje på dette facebookeriet, men Sydama har ymta frampå om at ho kan be alle som vil om å finne sida vår, trykke kjapt og brutalt på "lik" (eller var det "del"?? Trykk båe, for å vera sikker!) - og slik vere med i den beinharde konkurransen om ein pappæning! (til alle dei som rynka på bryna her; pappæning er då altså vår variant av gåvekort). Pappæningverdien vil tilsvare antal likarar på sida vår, så her er det bare å verve 

til svetten silar! 

Lykke til, godtfolk!

vårnytt frå Småfolk!

Endeleg har me fått inn klesplagg til dei aller minste! 

Her er eit brøl av ein body, frå str. 56-86. 

sengetøy frå Froy & Dind

smakebit på tydagens Røvarkaup

Body frå Småfolk i str. 92 og 98

Om att i kremmargarasjen

Laurdagens Handelsmøte i Gamleveg viste seg å bli ei fortreffeleg anledning til å vise fram herleg vårnytt frå Småfolk! Jaudå, vårnytt - i fem kalde og sno under skoa, men likevel!

Tusen takk til alle som svinga innom oss i kremmargarasjen!

Og ikkje minst, tusen takk til våre fire små kompisar, som meir eller mindre frivillig (og uvitande) stilte som modellar på ein kald catwalk framfor Silkevippa! Den minste den einaste som heldt fokus fram til scena - dei tre resterande nøya seg med å vera beinflygande reklame..! Glade, varme småfolk, fins ikkje betre reklame enn det!

ikkje akkurat lynande effektivt...

Tøydokka skuler bort på Pfaff'en som står der, ventande. Klar til dyst. Tøydokka er ikkje så klar. Ho sit og festar fjørten trådar i det som skulle ha vore ei jolegåve, men som no ikkje er det lenger. Ho tar seg i å tenkje at nettopp den jolegåveproduksjonen er skremande lett samanliknbar med visa som byrjar med "Og det var vesle Jensemann, han strever dagen lang". Jensemann snekra, Tøydokka hekla denne gongen. Det starta bra. I fint driv og i harmonisk samspel med både heklenål og dobbel tråd. Men det vara ikkje så lenge.  Parallelt med ei heller trasig realitetsorientering kring kva ho får tid til av handarbeidssysslar klemt inn mellom bleieskift og snørrtørk, minkar ambisjonane. Og i likskap med Jensemann, som ho no kjenner ei sterk samhøyre til, endar Tøydokka opp med noko langt anna enn ho hadde planar om. Men det er hekla med kjærleik, Åse Marie - hugs no endeleg det!

Med andre ord - noko rykande ferskt heimesauma på laurdagens Handelsmøte kjem ikkje på tale! Her er det trådar som skal festast!

siste salsinnspurt!

Morgodagens tysdagsope er ein av dei siste sjansane til å gå på jakt etter godbitar på sal i Om att sine hyller! Ut januar har me 20 % på alle varer, i tillegg til halv pris på ein relativt høg stabel med klede og boksar som me synest det er på høg tid at skifter eigarar!

betre seint enn aldri..!

Jolebord rett over nyåret, det kan faktisk funke fin-fint! 19. januar tromma Sydama og Tøydokka inn styret til kalas. Tidvis likna det ein kveldsopen familiebarnehage, men i takt med at klokka tikka mot god-natt-tid-for-småfolk, byrja det å likne eit lystig lag rundt eit bugnande bord! Maten tør me påstå at var god (det vil seie, Tøydokka sine smakslaukar var, kjedeleg nok, delvis i streik - men ho åt like mykje (kan hende meir) enn om dei hadde vore i ordinær teneste. Slik sett kan ho strengt tatt ikkje gå god for noko, men det minka då i alle fall bra i bollar og fat. Salat vart det nok av, men det sannsynlegvis heller av total mangel på berekning...). Og er maten god, konkluderar me med at selskapet er vellukka!

Ei stor takk til eit særs velfungerande styre, stuvende fullt av styremedlem som ofrar tid, krefter og ein laurdagskveld i januar på Om att!

morgodagens Røvarkaup

I morgo sparkar Tøydokka igang Tysdagsope 2013!

Dørene opnar som vanleg litt på halv åtte, og denne veka har du sjansen til å sikre deg drikkeflaske frå Ugly til kr. 135,-

JANUARSAL!

Laurdag 19. januar, mellom kl. 10-15.00, er det lite anna du bør ha på agendaen enn ein tur innom oss på Om att - litt på halv åtte. Då klaskar me til med januarsal, og kan friste med 20% på ALLE klede. Det er tid for å rydde plass i "hyllene" - og då må me ha hjelp!

Sydama og Tøydokka skal denne dagen òg prøve seg som kokkar, ettersom styret skal ha eit forsinka jolebord denne januarkvelden. Om du er snill (og viss du tør...) kan du heilt sikkert få nokon smaksprøver.

kan det bli herlegare?!

Det er ikkje bare me som har blitt forelska i Ugly sin nyaste serie, Activist! Ein kjapp kikk inn på nettsida deira, og så er du sannsynlegvis seld..! Me sender ganske så snart ei bestilling, og er det noko du nadrar etter å bruke pengar på er det bare å huve ut! Oppgje klesplagg og storleik - og så fiksar kremmarene på hjul resten. Ugly har streva med sprengt lagerkapasitet og utselde plagg ei stund, men skal ha starta 2013 med godt mot og orden i sysakene. Me gledar oss til pakke i posten!

Godt nyttår, folkens!

Oi, oi, oi - det vart siste innspurt før jol, og kremmarane let blogg vera blogg. Det vart romjol - og tastaturet tok joleferie. Det nærma seg stygt feiring av året som venta på oss - og på bloggen vår var det like stille... 

Men NO er me tilbake, og vil ynskje alle eit strålande godt, nytt år!!